الدنيا الصغيرة

الدنيا صغيرة .. بس أحيانا بناخد حاجات علي قلبنا كأنها أخر الدنيا و حاجات بتاخد أكبر من حجمها  .. مع إنها والله صغيرة .

أصغر من إنك تخش كلية طب مثلا (الناس دي بتتعب فعلا)

أصغر من إنك تخانق إخواني علي مشروع النهضة (هيقولك أنا مش إخوان)

أصغر من إنك تشجع الزمالك أو تتابع الدوري أصلا

أصغر من إنك تضغط لايك و تنتظر ماذا سيحدث ( في ناس لسه منتظرة)

أصغر من إنك تتفرج علي فيلم واحدة محتارة تحب Vampire  ولا  Werewolf

أصغر من إنك تضيع اليوم في المذاكرة و الدح ( بس التفوق حلو مفيش كلام )

أصغر من إنك  تخاف من امتحان , اهي علقة و هتعدي

أصغر من إنك تخاف من امتحان شفوي , خش بقلب جامد مش هيقتلك  , اخره هيديك صفر يعني

أصغر من إنك تقول سر لواحد و تقوله مايقولش لحد  

أصغر من إنك تتابع مسلسل تركي 

أصغر من إنك تشغلي نفسك هي عاملة الفستان عند مين و شبكتها بكام

أصغر من إنك تترعب من النتيجة ( اللي حصل حصل يا وحش )

أصغر من إنك تتخانق مع حد بتحبه ( محدش ضامن عمره)

أصغر من إنك تشيل الهم من دلوقتي ( يا عالم بكرة مخبي ايه )

أصغر من إنك تزعل علي حاجة راحت منك ( خليك متأكد انه خير )

أصغر من إنك تقول لواحد ابقي اسأل عليا ( لو انت تهمه هيفضي نفسه 5 دقائق و يسأل عليك )

أصغر من إنك تشوف مين بيقول ايه و ليه عليك  من وراك (كفاية ان معندوش الشجاعة يقول في وشك)

أصغر من إنك تحط واحد في دماغك

أصغر من إنك توجع دماغك

باختصار ..

الدنيا أصغر من إنك تعيش يوم زعلان

=====

* لو عجبك الكلام Share أو Tweet بين اصحابك

* لو مقرأتش دي افتكر و افرح ..اقرأها يمكن تفرح

* لو الاتنين عجبوك .. اتفرج علي بقيت الحاجات من هـنـا

Follow @OsOsbek